Mésyé, Médam, La Sosyété koz èk moin sé koz èk in kouyon, mé sé o pyé d’lo mir k’i oi lo bon mason. Zordi ni kontinyé vizit Lafrik an provèrb é nou lé dann Sénégal mé si zot i vé provèrb-la i trouv son plass prèss partou.I pé an avoir galman isi La rényon pars la plipar d’tan si lo momon i travaye sé pou amenn lo pli nésésèr dan la kaz pou son zanfan é lo pli nésésèr sé lo manzé la plipar d’tan. Sa lé vré pou bann madam lé fanm dé ménaz, pou sak néna pti komèrs, pou sak i koud é tout bann boulo konmsa. Sa lé vré gankor pou bann madam plantère. A ! Biensir néna bann madam i fé gran-gran métyé mé dann in ka konmsa na poin arien i disting azot avèk bann bononm néna gran-gran travaye. Alé ! mi kite azot rofléshi la dsi é ni artrouv pli d’van. Sipétadyé.