Mi souvien, dann tan lontan, l’avé bann z’ouvriyé dsi la rout : in bon pé z’ouvriyé pou in pti bout shomin. Avèk in pti panyé pou transport makadam. Fason k’té i fé, té i oi zot téi fors pa. Lo tan la shanjé, mé lo kozman lé touzour parèy : i travay touzour pou la valèr ! Sof si konm dann tan l’avé in kolonm pou fé alé pli vit. Sof si nana in shèf d’ékip i fé aksélèr lo mouvman. Sof si la krintiv lo shomaj l’apré titiye lo travayèr…

Boudikont toultan ké la pèy lé pti, lo travayèr va doz son l’éfor pou pa fé plis k’i fo. Sa lé normal, sa lé natirèl ! Mé koméla, lo patron i ansèrv mashine, pli-z’anpli sofistiké. Pou kosa ? Pars konm i di, si vi goumant la prodiktivité d’lo travaye, ou i goumant osi la moné k’i tonm dann la posh bann kapitalis. L’ésploitasyon l’om par l’om sé touzour la baz nout l’ékonomi.