Pou kossa ?

Pars san tro rofléshir demoune i mète lo doi dsi in poin fèb dannout lékonomi sé la késtyonn d’in dévlopman insifizandann nout péi.zistoman in dévlopman insifizan é kissa i pé shanj sa ? La pa lo mèr pars lo mèr i pé dir li va mète an plass bann kondission pou ariv a sa mé o-fon li koné bien li ariv ar pa fé sa.

Si ni suiv lanaliz noute parti kominiss ni oi bien néna kékshoz i klosh pa dann in réponss konmsa : pou done demoune travaye i fo dévlop lo péi é pou dévlop lo péi i fo bien kass in sistèm ni apèl néo-kolonyal. Pars li blok toute bann tantativ pou dévlop nout péi.

Romarke anou bien, nout parti i di pa zamé k’i pé pa kass lo sistèm kolonial mé li di i fo kass sistèm-la é pou kass-sa li di i fo fé in plann dévlopman an akor avèk toute bann fors viv La Rényon é déboush dsi in loi-program pou mète anlèr nout lékonomi é si i fé pa sa nou lé dann lo rèv épi la bone intanssion mé pa dann la réalité.

Alor konm zénéral De Gaulle téi di pou in n’ot afèr, ni pé sote dsi nout shèz konm in kabri an répétan dévlopman ! dévlopman ! dévlopman ! mé nou lé konm sèr Ann pou linstan ni oi pa arien arivé.

A bon antandèr salu !

Justin