Sa in kozman i di kékshoz bann vyé pèrsone isi La Rényon é pa forséman dé bone shoz. Fitintan, kisoi dann tan lésklavaz kisoi dann tan z’angazé inn parti sansa la totalité lo pèyman lété an natir. Si tèlman té i falépa aspèr fé zékonomi, épi in zour gingn in patrimoine dann in sityasion konmsa. Aprésa, kan lésklavaz té fini, é kank l’angagis l’ariv son bout, bann travayèr la gingn in salèr mé pa touzour pars bann mové zabitid la kontinyé. Zordi ankor néna d’moun i travaye pou manzé kui. Sak lé sir, kan i di in moun lé konmsa la pa pou flate ali-dizon in manyèr trète ali konm in sitoiyin dézyèm zone. Alé ! Mi kite azot rofléshi la dsi é ni artrouv pi d’van. Sipétadyé !