Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Tro aval koulèv la pa bon pou la santé !

mèrkrodi 16 octob 2013, sanm Justin

Matant Zélida la ékrir Justin :

Mon shèr nové, mon spès salté, rouj de fon dovan léternité, si mi konpran bien so foi isi, zot lé pa kontan pars gouvèrnman la nonm in madam Ledoux konm lanbasadèr la COI é i sifi dsa pou fé mont zot gaz. Sof mon réspé, mi pans pa lo madam lé pa kapab zoué lo rol. Mi pans pa banna la parti rode in zéro la gosh in shif pou zoué lo rol lanbasadèr... Mi antan solman zot l’apré di n’arté ki fo in Rényoné pou okip in post konmsa. M’a dir azot franshman mi konpran pa zot rézoneman. Sé konmsi zot i pans i fo in Rényoné pou roprézant La Frans dann loséan Indien pars la COI sé konm shakinn i koné sé la komisyon loséan Indien é sanm pou moin èl lé bien kalifyé pou roprézant lintéré La Frans, sof a dir lintéré la Rényon sé pa lintéré La Frans é si zot i pans sa bin lèr-la sé in n’afèr grav. Pétète, moin la mal konpri, mé konm bann moun la droite i di : avèk zot na touzour in fizy kas kontour par la !Tok ! Pran sa pou toi !

Justin la fé pou répons :

Mon vyé matant ki koz touzour la boush rouvèr, sak ou i di i étone pa moin de ou. Poitan la pa solman bann kominis i pans konm nou. Na désèrtin sosyalis galman, épi d’ot ankor. Donk nou lé pa tousèl dann in konba konmsa : nou lé pa tousèl é rozman pars nout konba lé just. La COI lé né pars bann péi lèst loséan Indien la pans lété bon zot tout ansanm i fé in kopérasyon pou tout avans ansanm. Sé sak toulmoun i pans. Mé konm La Rényon sé in départman é in réjyon La Frans la fé an sort, la Frans i travay avèk la COI sanm pou nou pou défann lintéré La Rényon dann loséan Indien. Mé, par in maléré sor, inn dé gouvèrnman i pans sé lintéré La Frans i doizète défandi é pa lintéré La Rényon konm nou Rényoné ni konpran lé shoz... Zordi gouvèrnman sosyalis i pous in pé pli loin, li nonm konm lanbasadèr in Fransèz de Frans ki sousyé pa ditou lintéré La Rényon é myé ksa na rien a fèr avèk La Rényon. L’èr-la vi konpran bien sa in n’afèr ni pé pa aksèp konmsa. Tro aval koulèv la pa bon pou la santé !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus