Médam zé mésyé, la sosyété koz èk moin sé koz èk in kouyon, mé sé o pyé d’lo mir k’i oi lo vré mason. Mé zami ala i n kozman, moin la vréman pèr li lé vré pou vréman. Kosa sa i vé dir ? Ala mon lésplikasyon : i ariv ké nou lé bien dann nout vi, ké nou lé éré é ké ni pans nout konfor moral, psikolozik é d’ot mo ankor an ik-pétète an nik - va dir toultan. Mé ni obliy, dan la vi ni marsh dsi in lign de krète. Soi ni suiv bien la krète é la i fo ni fors pou tienbo lékilib, soi ni kapote dann fon é si ni kapote dann fon, ala in vré problèm : soi ni gingn romont anlèr ziska nout bonèr pèrdi, soi ni arète dann fon. Amoins ké ni pran in n’ot shomin é ké shomin-la i kontant anou. Donk sirtou i fo évite lo rèstanplas, lo parèss intélékstyèl.I fo ni di : néna in nouvo mond. Ousa ? Kék par dann nout shomin d’vi. Ni pé trapé pa trapé ? Lo bonèr sé kan ou i rode, la pa kan ou la fine gagné. Alé ! Mi kite azot rofléshi la dsi é ni artrouv pli d’van. Sipétadyé.