Souvan dé foi, mi poz amoin in késtyon, mé san trouv in répons valab. Késtyon mi poz amoin, sé sèt-la : mi domann amoin si lé posib pa fé arien, sansa près pa arien, san mèt finans out koléktivité dann malizé. Pa bann partikilyé, pars sanm pou moin, dann lo ka bann partikilyé, shakinn i rogard midi dovan son port é li fé pou lo myé. Boudikont, li fé konm li vé, pars si na in kèkshoz kasé, sé ali d’réparé... konm di mon gran mèr, sé son biskui.

Kosa i fé majine amoin sa zordi ? Sinploman ké solon bann radio, mésyé Didier lé pri dan la kol jak pou lo tan li lété mèr la komine Tampon. La Kour réyonal bann compte i fé ali in bonpé roprosh. Konm par égzanp an avoir miltipliy par kat lo bann dépans pou fé la fèt. Konm par égzanp ankor an avoir goumant lo bidzé pou lo pèrsonèl... Boudikont, lo rézilta, sé la komine k’i pran zordi, é i anparl goumant bann z’inpo, é pa arien k’in pti pé, kèkshoz rant vin pou san épi karant pou san.

Tazantan mi pas dann Tampon, é mi domann amoin bien kosa komine-la la fé dépi in paké d’zané konm shantyé konsékan. Mi koné la ronons la Rokad, la Réjyon té dakor pou péyé. Mi koné la pa fé gran shoz dsi la késtonn dévlopman dirab. Mi koné osi lé bien dir pou sirkil dann vil-la. Mi koné ankor demoun i souplègn pou la késtyonn lo. Anfin, in sityasion lé pa dign sèt in komine plis soisant-dis mil z’abitan.

Donk, la répons mi donn mon késtyon, sé sèt-la : lé posib an avoir problèm l’arzan séryé san fé tro granshoz. L’èr-la, mi domann amoin kosa va fé kan li sar fine fé son ravaz dann finans la Réjyon ! Parèy kan mi antan la list bann droite komine Sint-Sizane apré anparl la proksimité, é mi domann si la pa in manyèr fane konféti l’arzan pou kontant in kliyantèl éléktoral, olèrk kontinyé bien ékip komine-la konm dann tan défin Lucet épi kan Maurice té mèr.

Justin