Oté

« Tro présé i fé pa lèv solèye »

In kozman pou la rout

Justin / 5 zwiyé 2019

JPEG - 43.6 ko

Médam, mésyé, la sosyété, moin lé sir, dann z’ot lantouraz zot i koné désèrtin moun lé pli présé k’présé. Zot i ariv épi zot i trouv drol tout travaye la pankor fé. Zot i tienbo pa an plas é toultan zot l’apré plégné : « Ou la pankor fé sosi ! la pankor fé sola. ! ». Myé k’sa, défoi zot i di si zot téi koné zot nora fé zot mèm. Ou la bo dir azot : « Bouj pa l’bato ! Alé dousman, la vitèss néna son tan ! ». Inposib ramenn azot a la rézon. Talèr zot lé kapab plégné solèye livèr i lèv tar. Touzis si dann fon z’ot kèr zot i pans pa la natir lé parèss. I pé ésplik plizyèr fason in manyèr fé konmsa : dabor ou i pé dir sa sé in manyèr pou mète lé zot dann la krintiv-lo stèss si zot i vé-épi fé fèr tout par lé zot. Fé aou si ou i vé mé aspèr pa la rokonésans out travaye. Touzis si ou i antan pa li apré dir : « Pèrsone i ède pa moin, moin lé tousèl pou fèr tout ». Dézyèm zafèr ou i pé dir néna in moun apré zigil moun-la kékpar é li la pèr gingn kozman. In n’ot manyèr sé ké lo moun i miltipliye lo bann tash néna pou fèr, é li ariv pi o bout. Sansa ankor li la bézoin rogard son fèyton. Alé ! Mi kite azot rofléshi la dsi é ni artrouv pli d’van. Sipétadyé !