L’ané 2018, La Kors i sava konète in réform inportan. Ziska sète ané, La Kors sé dë départman, in réjyon avèk in majorité réjyonal dirijé par bann nasyonalis. A partitr d’l’ané k’i vien nora pi dé départman mé nora in sèl réjyon : donk in l’asanblé inik avèk plis pouvoir ké koméla.

Lo favori sré bann nasyonalis, d’apré sak mi lir dann zournal. Dabor pars lo koalisyon bann nasyonalis l’amontr zot lété kapab zèr lo péi konm k’i fo donk in bonpé bann kors lé rasiré. Arzout èk sa lo FLNC la désid dépoz lé z’arm. Solman in pé, an parmi bann jenn lé in pé désu. Pou kosa ? Pars zot i pansé Lo pèp kors té i sava pran lo pouvoir mé dann lé réalité zot la vi bann nasyonalis zèr lo péi an bon pèr d’famiy. Donk z’ot santiman romantik lé in pé afayi.

Bann sosyalis épi bann radikal de gosh i prézant pa lo zéléksyon. Bann kominis é bann z’insoumi lé alyansé. La droite, son koté nana dëlist é fron nasyonal nana inn. Bann nasyonalis lé divizé mé la pa pou sa z’ot rasanbleman lé riskab ète afayi. Zot i pans sinploman lo péi lé riskab an avoir plis l’otonomi dann l’avnir.

Si ni arvir in pé an aryèr, ni rapèl kan isi nou la domann lo bidèp , la droite la di : koup pa nou ! Désèrtin progrésis galman la déklar l’inité La Rényon dann danzé… Mi éspèr zot i an souviennn sa. La bidèp dan La Kors la pa diviz lo péi an dé mé an kontrèr la ranfors lo santiman kors. Isi osi lé shoz nora pi éspas konmsa.zot i pans pa ?

Ni éstop tèrla, é ni avèye kosa i sava éspas dann péi La Kors.