Oté

Troi sèr épi Itrimoubé lo monstré : in zistoir Madégaskar

Zistoir pou rakont dsi galé - sizyèm morso

Justin / 11 zwiyé 2020

Zistoir mi rakont azot, sa in zistoir Madégaskar, Honoré Rabeshala la donn amoin in kopi é moin la mète ali dann la lang kréol La Rényon pou bann moun i lir zoinal Témoignages é pou tout sak va lir sa dann nout domin anou. Astèr sak néna galé dann zot kour, mi invite azot asir épi rakont lo zistoir pou tout demoun va pass koté zot épi va ékout listoir-la. La pankor fini é nou va kontinyé pli d’van.

JPEG - 43.6 ko

L’avé inn foi, pou inn bone foi, mésyé lo foi la manz son foi èk in grinnsèl.
Zistoir Itrimoubé épi lot roi sèr lé dsi la finisyon. Dèrny é foi nou la vi la mor lo monstré épi nou la vi koman lo zoli pizon la ramenn Ifara son mézon. Mé nou la di osi Ifara la fé dépoz aèl koté le pui pou rogard in pé lé zalé-véni avan prézant aèl dovan son bann paran. Sé konmsa èl la vi la zene sèrvant alé rode delo dann gro fénoir. Sé konmsa galman k’èl la vi son dé sèr apré zoué zot mizik é anvoye son dé paran baladé kan la domann azot in kou d’min pou ranz la mézon avan dormi. El la vi son papa bouyan avèk la kolèr mé pa kapab mète lord dann son ménaz. El la vi ali trist é dann son kèr èl la pans lété konmsa pars son dé sèr l’avé sirman di èl lé mor.

Kriké ! Kraké ! Kriké Mésyé ! Kraké Madam !
Kan la jenn sèrvant té apré trap delo dan lo pui, Ifara la aparète dovan èl. La jenn fiy la mank tonm san konésans. El la di : « Madmoizèl é ou sa ? Out dé sèr la di ou lémor alor out papa, out momon épi moi mèm nou la kroir azot. ». Ifara la di la sèrvant alé dousman la kaz épi di son momon avèk son papa èl la rotourné. In néstan apré lo papa épi lo momo, la sort déor épi zot la vi avèk zot zyé zot troizyèm fiy lété bien vivan. El la rakont ksa l’ariv aèl é sirtou èl la pa mank dir koman son dé sèr l’avé mète aèl dann pyèz.
Kan Ifara la rant dan la kaz, èl la aparète ankor pli zoli k’avan é son dé sèr lété kaziman vèr avèk la zalouzi. Lo papa la donn lord son dé promyé fi alé dor dann kalbanon é Ifara avèk la jenne sèrvant la gingn la plas d’onèr dann la mézon avèk lo dé paran.A partir d’la lo dé sèr la pran lo rol sèrvant dan la kaz é zot té blizé aksèpté si tèlman zot lété koupab par aport sak zot la fé zot pti sèr.

Zistoir-la él ini, si èl lé vré, èl lé vré. Si èl lé mantèr la pa moin l’otèr. Zistoir-la sa pou rakont dsi galé épou finir mi di azot in bon dalo nHonoré Rabeshala la donn amoin in kopi é moin la mète ali an kréol rén yoné pou bann léktèr nout zoinal Témoignaz.

Koton mayi i koul, rosh i flote, l’avé inn foi pou inn bone foi mésyé lo foi la manz son foi èk in grinnsèl.