So matin, moin la lir in mésaz, in moun mi koné bien l’anvoy sa pou moin. Mi sava pa dir son nom pars mi admir pèrsone-la, pou d’ot rézon, é sirtou pou sak èl i fé dann karo nout kultur. Donk, dann mésaz-la, lé marké i sava fé aranj trotoir rant la méri épi marshé forin Sint-Sizane. Lé bien ! Lé bien nésésèr ! Mé sak la fé tik amoin in pé, sé kan lo moun i ékri : Sint-Sizane i dévlop avèk la Réjion. Biensir, i vo mié an avoir in trotoir bien aranjé olèrk in trotoir an kas-kasé : sa lé mié pou demoun i désid alé a pié marshé forin an sékirité. Sa lé mié osi pou bann demoun i sava lo stad ; épi la sal "Roi Kaf", lo park l’amizman pou marmay épi d’ot zafèr ankor, demoun i koné bien, é pa solman d’moun Sint-Sizane. Arzout èk sa, i vo mié nana in n’afèr prop, zoli, konfortab plito k’in vilin z’afèr ou i may out pié dodan, é si ou lé in madam, é si ou i mèt soulié talon, prépar aou pou alé rod in n’ot soulié. Mi pé di ankor, in bon trotoir i konplèt bien tout lo travay lété fé dann santre-vil Sint-Sizane.
Mé, moin pèrsonèl, moin na konm in l’alèrji kan i parl la Réjion avèk Didier Robert, épi kan i asosié son politik avèk lo mo “dévlopman”. Pou kosa ? Pars, pou moin, sé lo pli gran kasèr ké moin la fine trouvé, é la pa son rout litoral sis voi va fé shanj amoin d’avi. Dévlopman épi li, sé dé ! Arzout èk sa, ziska zordi, la rout santre-vil sa i dépann la Réjion — té in rout nasional sa avan ! — donk, mi pans la Réjion va fé arienk sak èl i doi fèr : lé a li, i fo li okip, é li romèt an éta, é li rétabli la sékirité dan l’androi. Sa la pa in zénérozité par rapor la komine, ni in zénérozité par rapor la CINOR, sa sé in l’obligasion. Konm di lo kont : si sé mon kaz, sé moin k’i répar, sé moin ki rétabli la sékirité épi in minimom konfor. Si la pa mon kaz, sé propriétèr k’i doi okipé, amèn la sékirité k’i fo épi lo konfor moin la bézoin. Lé konm sa é pa otroman.

NB : I mankré pi k’i konplimant la Réjion pou in n’afèr sé li ki doi fé.

 Justin