Trouv in limanité konmsa shé in zanimo lé plisk’inkroiyab

7 octob 2024, sanm Justin

Mézami mi sorte lir in zistoir, mi diré pa inkroiyab tou kour, mé in kroiyab par son limanité. In péshèr apré pèsh par koté bannzil Faralon : sa lé pa tro loin San-Francisko dann la Californie. Wala ké li ropèr in balène anmayé konm pa possib dann in tramaye pou la pèsh. Lo péshèr la konprann si néna poin in lintèrvanssion lo zanimo té riskab mor étoufé. L’èr-la li lapèl o sékour dann son radio é plizyèr z’èr d’tan apré in lékip sokour l’arivé. Pou konstate lo balène lété si tèlman anmayé l’avé arienk in solission sé d’koupe bann maye lo filé inn apré l’ote pou dégaj lo zanimo.

In projé danzéré pars in sèl kou d’nazoire é lo plonjèr té riskab gingn la mor… Bann plonzèr la travaye in bonpé d’tan : plizyèr z’èrd’tan avèk bann kouto rokourbé é pou finir zot la nyabou libèr lo balène… Inn foi k’té fini libèr ali, banna la vu lo balène apré najé an fézan bann ron zoiyé, pou amontr son kontantman.

Aprésa èl la rovni pou oir shak plonjèr épila pouss banna dousman konm pou romèrssyé azot… Sak la dégaz la guèl an koupan lo dèrnyé morso la korde la rakonte lo zyé la balène téi suiv ali partou é aprésa li sar pi parèye ké li lété avan.

Sépa si in zour inn rante sak va lir sa nora la shanss d’ète dann in movèz pass épi demoune i vien sokour ali pou li konprann vréman kossa i lé la rokonéssans. Zistoir la l’ariv lo 26 séktanm sète ané é lékip Nassyonal geography la mète sa dsi son site tèl fasson bann z’umin i rokonète in latitide konmsa shé bann zanimo — in latitide ni pé dir imène mèm si bann zimin zot mèm lé pa touzour imin. mi panss zot i konpran amwin.

Mi ropran zistoir-la pou k’le moune k’i assassine bann zanimo éstraordinèr i rann azot konte bann mové zakssion zot i fé é pétète déssèrtin gouvèrnman va désside arète lo massak bann gran zéan dan la mèr.

A bon antandèr salu !

Justin

Padport