Mon listoir i spass dann bann zil Hawaï. Konm i di dann liv zéografi, sa lé dann zantipode La Rényon. Si wi pèrs in trou dann la tèr é ké trou-la i pass par dann milyé la tèr, ébin lo trou va sorte dann bannzil Hawaï k’lé dann noute zantipode..

An parmi bann zil la lavé inn kaziman okipé par in tralé lo shate. Donk bann zamérikin — intélizan konm zot i koné !- la désside fini avèk la rass lo bann sha avèk in bonpé désharj produi shimik. La tyé toute lo shate.. Mé sé la popilassion lo ra ké la okipe la plass par santène é par milyé. Bann zamérikin-in bann boug intélizan-la bonbarde bann ra koud’produi épi la tyé lo bann ra. Astèr kossa k’i ariv ? Puss la débarké é la kouvèr lo zil. Téi rèss arienk pou kalkilé ! éstèr mé mi di pa zot la solission pars mi koné pa si bann zamérikin-intélizan konm zot i lé — la trouv in solission.

Zot va dir amwin poukoué rakonte in zistoir san ké ni tète ? Pars so matin in kamarade la anparl amwin moush blë é la di amwin bann bébète-la la tyé rézin maron pars sé in plante invaziv é bann karo rézin maron la konm disparète.. Mé oila, bann zéssin moush a myèl la disparète an mèm tan. Donk li la di amwin téi falé fé vnir bann zènmi lo bann moush blë-in prédatèr d’apré sak li di — é mwin la réponn ali : « Aprésa kèl modi plante sansa modi zinsèk va okipe la plass ? » é li la di amwin, boudikonte li koné pa.

Pars pou mwin wi tyé inn, mé l’iote i ariv, wi tyé l’ote é in n’ote i ariv ziska la sin Glinglin konmsa. Alor li la di amwin li koné pa é mwin non pli mi koné pa donk mi méfyé sa par avanss… Si sa i éspass konm zistoir lo shate dann bannzil Hawaï nou néna rézon d’méfyé malèr pou arivé.

A bon antandèr salu !

Justin