Mi pans zot i koné kozman-la. Pa arienk pars mi tiliz ali souvan dé foi, mé pars sa sé in patoi bonpé vyé moun i koné. Biensir sa la pa in provèrb, biensir sa in kozman pou fé ri la boush sansa près pa. Moin pèrsonèl mi pans sa i fé grimas amoin plito k’in n’ot afèr... Mi koné pa zot, mé moin la kouyonis sa in n’afèr pou moin lé insiportab. Lé vré nana in patoi i di : « moun vilin nana ankor é moun kouyon na pi ! ». Zot i pans sa lé vré zot ? Moin non pars si d’moun kouyon l’avé pi akoz nana ankor in kantité d’moun manipilé, roulé dann la farine, abizé é tout sort z’afèr ankor ? Sa sé in n’afèr n’arté pa arivé si l’avé poin inn bone doz kouyonis dsi la tèr . Alé ! mi lèss azot réfléshi la dsi é ni artrouv pli d’van sipétadyé.