Mi souvyin kozman in ministrèz l’outre-mer, na poin si tan tèlman lontan ké sa. D’apré sak èl té i di, i lèss ar pa pèrsone dsi l’bor shemin ! Parol ministrèz ! Parol gouvèrnman la Frans !
Donkalor, parol la Frans ? Promès ministrèz, promès gouvèrnman la Frans, donkalor promès la Frans ?

Na in vyé madré té i apèl Edgard Faure té i di, k’in promès i angaz aryin k’sak i kroi, pa sak i fé. Li té i di galman, la pa la zirouète k’i shanj diréksyon, sé lo van.
Byin sir, lo van la shanj diréksyon, pars i fo dégrèss lo mamouth, pars lédikasyon nasyonal soi-dizan na tro d’moun i travay dédan.
La pa parti rode si zot lété la konfyans bann marmay. La pa parti oir si, par z’ot léspéryans, zot té i nyabou rann in gran sèrvis dann lékol. La pa fé in bilan, byin antandi. La pa kass la tète avèk lo droi di travay, la pyétine ali konm in vyé shifon sal.

Pétète, banna i koné kozman lo roi d’Prusse kan la fash avèk Voltaire, kan li la di : « Zoranz pèrsé (ou byin prèssé), la po dann panyé ! ».
Ala zordi, zot lé dsi l’bor shemin.
Dsi l’bor shemin, lontan lavé la kivète. Lèrla zot lé dan la kivète,
Mé poitan, zot la rann sèrvis marmay, zot la rann sèrvis bann paran, zot la byin ède bann z’amontrèr an titr. Sa zot i koné, sa l’moun i koné. Tyinbo, la pa lèss shapé !

Justin