Dabor, inn la di konmsa i fo tir la lang kréol dan la tète bann moun La Rénion. Apré la di i fo intèrdi maloya, moring, tanbour malbar é koitéra... Mèm tan la anvoy bann zénès par bimidom an Frans. Épi, la sèy shanz manyèr manzé bann rénioné. Épi la déside nana zafèr i fo pa di : parl pa la lang kréol, lo pèp rénioné, listoir La Rénion, maloya, kabar, moring. Nana mèm in parti la di li apèl parti sosialis l’ile de La Rénion (P.S.I.R). Nout péï té pi arienk in boute latèr dann loséan... Na dé boug, zot la mète la zol akoz té apré bate maloya dsi la plaz sin-Zil.

Koman i apèl sa ? Sa la pa in tantativ zénoside kiltirél sa ? Mi di tantativ, akoz zot plan la foiré.

Lé ga ! Mazine in pé, si zot plan lavé réissi, koman nou nora été zordi : pi d’lang kréol La Rénion, pi d’maloya, pi d’kabar, pi d’tanbour malbar, pi d’marsh dann fé, pi d’moring, pi d’bob, kayanm, batavèk. Manzé plate pou toute demoun. Fransé robo, konm manyèr kozé !
Banna la rod vide nout tète par anndan, pass nout nérone-a-la-sho.
Kroi pa bann zalyénèr la fine ronons zot konplo : zot i shanz solman tik-tak. Alors, nou, pou nout par, i fo tyinbo lo rin an maronaz ou bien an ofisyèl, sansa lé dé an mèm tan.

Justin