Mésyé, Médam, La Sosyété, koz èk moin sé koz èk in kouyon-mé sé o pyé d’lo mir k’i oi lo mason. Mi pans zot i koné kosa i lé komandèr ? Dizon in shèf bitasyon néna konm fé travayekisoi zésklav dan tan lontan, kisoi bann zangazé, kisa zoinalyé. In pé partou dann bann gran-gran bitasyon l’avé komandèr é kroi pa ou i trik azot konmsa pars zot lé formé, tayé, pou ésploit lo travayèr. Pou mézir méné kann ou l’apré apropté li trik aou. Pou plant kann li trik aou galman. Pou donn manzé zanimo li trik aou ankor. Souvan dé foi-pa toultan-komandèr lété in abizèr. Alala pou kosa lo poète Jean Albany la fé in gayar fonnkèr i port lo nom « komandèr » é Pierrot Vidot la shante sa dann kasète « chante Albany ». Zordi komandèr an tan ké komandèr mi pans pa si i égzis ankor, mé i égzis d’ot néna d’ot nom é désèrtin i rann demoun maléré dann travaye pars léspri abizèr lé pa mor réèlman. Alé ! Mi kite azot rofléshi la dsi é ni artrouv pli d’van. Sipétadyé !