Mi ansouvyin, na poin lontan, moin la parti in manifèstasyon kiltirel la Réjion. Pars mi pans la kiltir, sa in n’afèr inportan pou in pèp. Dizon sé inn an parmi bann poto prinsipal pou mète anlèr nout dévlopman dirab. Nou nora lokazyon anparlé !
Mé zordi mi vé koz déssi in n’ot afèr ; bon ! ala li la !

Lavé dann manifèstasyon-la, inn-dé moun té i fé foto, téi domann inn koman li apèl, l’ot koman i apèl, épi téi fiziy lo pé avèk son laparèy, san domann lotorizasyon, konm si out portré té pi aou. Aprésa, dan la somènn, moin la vi in bonpé portré dann in zournal épi lété marké an lèr "VIP". Moun inportan ? An koué ? Pou koué ? Mi oi pa tro !
Pou mon par, pli inportan pou moin, sé zarboutan, la pa "vip", ké mi koné mèm pa byin kosa i vé dir.

Par ékzanp, in moun i dévlop vréman lékonomi son péi, in n’ot i soutyin bann maléré, in maloyèr rokoni, in lékrivin, in shèrshèr k’ i trouv bon z’afèr byin itil, in moun la politik sipéryèr lé zot dann travay li fé, bann plantèr la fé la tèr avèk zot gongonn soufrans... tousa sé in bann zarboutan, i tyinbo debout la kaz : la kaz La Rényon, la kaz l’oséan Indyin, pétèt plis ankor.

In "vip" sé in létoil filant, li pass épi li disparèt. Mi oi pa kisa i pé kontant ali été in létoil filant. Alor, "vip",… larg in pé nout lourlé siouplé !

 Justin