A ! Vakans, zot i koné pa koman bann marmay i em sa kan i ariv ! Marmay i shant, i dans, i fé la fèt. Mi ansouvien in pti shanson té ki di konmsa : « Viv les vacances, A bas la pénitence, Les cahiers au feu, La maîtresse au milieu ». Hé ! lé ga i fo pa pran lé shoz o promié dëgré, in ! na poin pèrsone pou brilé, la ! In pti kozman solman pou di si bann marmay lé kontan, in bon pé bann paran lé bien annuiyé.

Marmay-la i fo okïpé, i fo donn manzé, i fo anpèsh ravazé. Sa la pa in n’afèr sinp, sirtou koméla. Lontan, marmay té i ginye kour partou, rod gouyav pou manzé, mang vèr-piman-désélé, okïp ti-lapin, ti-poul. Zoué lou-kourï, la krosh, koud-pié bourant. Bann ti-fy té i zoué ti-kaz épi té i èd zot momon. Bann garson kan lété in pë for té i èd zot papa. Dann bann zanfan, sak lé plï gran i okïp sak lé plï pti. Koméla ankor ! dé foi, i pins lê pli pti akoz i anpèsh zoué !

Koméla, souvan-dé foi, marmay dann vakans i ginye pi viv konm dann tan lontan.Kisa, zordi, i sar lès son zanfan fé ninport dëkoi, sof si li lé dan lobligasion. Antansion lantrènman kamarad ! Lé riskab fini dan la délinkans ! Mon dié ségnèr, mizèr d’in sor ! Par-plas nana sant aèré solman lontan té i pèy pa, éstèr bien souvan i pèy. Bonpé dmoun,larzan napoin an sïfizans. Nana bann paran lé bien anbarasé. Marmay i pas pa toultan in bon vakans. Talèr kan lékol i ariv, marmay konm grann pèrsone i di : lé tan lé fini so koméraz vakans-la !

Justin