Inn shanss pou nou ? Lé posib antouléka la pa ziss tir lo plan dsi la komète, pars sé kan lo match lé fini k’i koné lo rézilta.Lo, rézilta kan i ariv la mi-tan sé in rézilta mé li lé pa définitif.
An touléka ,vi nout éstatu départmantal nou va gingn fé vaksine anou si nou lé volontèr é si in pé pliss la moityé d’moun i vaksine ni pé aspèr lo virus lé riskab d’ète batu shé nou. Mé alon port antansyon in n’afèr : issi dann loséan indien si nou va gingn fé vaksine anou, néna in bonpé d’moun dann l’antouraz i gingn ar pa fé vaksine azot.Madégaskar i di li va kontinyé avèk lo tizane li la in vanté.Mwin la pa antann dir Moris i sava vaksiné, tou konm komor, épi d’ot gran péi...Banna va kontant azot avèk l’iminité akiz zot va trap avèk lo tan, pi avèk la soufranss zot popilasyon.
La késtyon mi poz amoin sé sète-la : in sityasion konmsa lé zist, lé pa zist ? Si arienk bann péi néna in sistèm santé konm la n’ot épi bann péi demoun néna larzan i pé vaksiné kossa ni fé avèk in gran prinsip i apèl la solidarité. Kouk ni fé avèk ? Ni anvoye dingué ?
Poitan néna in bonpé maladi i égziss pi, pars toulmoun dann tout péi la bénéfisyé in vaksin sansa in trètman la pèrmète azot élimine maladi konm la fyèv palidéène, konm la fyèv jone épi d’ot ankor.Talèr mi panss i parl ar pi d’sida.Talèr nou va aprann tèl é tèl maladi la fine disparète é nou va pans tanmyé anfin.
Mi sort lir dann in bonpé péi la plipar d’moun na poin lo moiyin fé in tèst pars i koute shèr, zot nora poin nonpli in moiyin pou vaksiné kont lo kovid. Alor mon késtyon : kossa i fé avèk la solidarité ? In min i lav l’ot d’apré sak ni di, mé dann in ka konmsa in min li lav ar pa l’ot é pou kossa ? Pars bann laboratoir nora bézoin in bon rotour dsi l’invèstissman, nora bézoin anrishi azot par kou d’milyar.
Ni pé dir lé zoli lo mond pandan la kovid, konm li sar zoli lo monda pré, kaziman konm lo mond avan. Bravo pou bann gran péi i domine lo mond. Nouvèl ord mondyal- Nou lé bien loin antouléka..