Mézami si mi di azot so zistoir d’vaksin, mwin lé pa klèr sanm li é mi panss mwin lé pa toussèl. Mwin la vaksiné, mé i paré lété pa obligatoir mi fé vaksine amwin. Sof ké la di amwin mwin sé in sizé a risk, alor si mi vé pa antass dann in sèrviss réanimassion mwin néna intéré a fé vaksine amwin konte la kovide é si mwin néna in pé la shanss konte tèl ou tèl varian. Sof ké si mi vé voiyazé. Sof si mi vé mon pti zanfan i vien fé amwin in piouk, sof, sof, sof étsétéra, étsétéra la ké lo ra.

Mwin la di mwin lé pa klèr sanm li, mé bande doktèr zot ossi lé pa klèr sanm li. Zot néna ka garde télé, sansa ékoute la radyo é zot va rande azot konte par zot mèm. Tazantan néna in doktère éspésyaliss dann la virolozi, li lé dakor san pour san pou fé vaksine de moune-li di galman li lé vaksiné. Mé néna in n’ote tro for i di li lé konte pa lo vaksin mé lobligassion pou vaksiné. Pars demoune i mor pa bokou, pars néna trètman pou sa é gouvèrnman i anpèsh rantré dsi téritoir franssé.. Pars in ta avèk in paké rézon mi rapèl pi bien.

Lo to la mortalité galman i poze amwin késtyon : si mi vaksine sé pou fé rokil la mortalité-la myène-tanpir k’i pé. Mé si i di amwin, mwin lé fine rante dan la bande vyé lé pa loin pou alé. L’èr-la mi poze amwin késtyon. Mi sorte lir in lartik i di konmsa nora pliss mor kovid épi varyan an parmi bande vyé vaksiné, ké an parmi bande jenn pa vaksiné. Aprésa lo lartik la di son kozman la pa in plédoiri pou pa vaksiné. Mwin la borde lartik la pou tonb dsi in n’ote té i di ankor d’ote zafèr pli inkonpréansib pou mwin.

Mézami, si zot i poze pa zot késtyon, é si zot lé klèr avèk sète afèr, sèl zafèr mi pé dir azot bravo é shapo ba dovan zot kapassité pou konprande lé shoz é haro dsi mon kouyoniss amwin é toute sak néna in brové dan la matyère. Astèr dê pti mo déssi lobligassion vaksiné épi amont ké ou lé par lo pass sanitère, mi pé dir azot solman sak mwin la lir dann mon livbande déssiné : « Obligatoire, san z’ète, tou an étan. » É mi apèl Descartes o sokour par raporte mon rézon i dérive in pé sé tan issi.

Nb : moralité, « lé pa nésséssèr fèrm son také kan ou na poin arien pou dire » : in parabol lo gran Coluche.