Kan la fé zéléksion prézidan la Répiblik, tazantan moin té i antann konm in son, mon zorèy té i sif, soman moin té i pran pa kont. Aprésa, in zour, mi antann konm de koi, lo prézidan la di, li sava fé la rouvèrtir a-gosh. Mi pran pa kont non pli ! Mi di sa i ashté inn, i vann dë (li égzazèr !). Pou moin, i maryé pa tilapia sanm lapin ; pot d’shanm sanm pla kouvèr !
Zéléksion i pas, i fé in nouvo gouvèrnman, épi in n’ot. Tanpir ki sava, tanpir nana sosyalis dann gouvèrnman, konm ministr sansa konm sokrétèr d’état : lo kouschnèr li, lo Bokèl li, d’ot ankor jènn konm vyé ; in pé té gran kamarad avèk Miterrand.

Ay !ay !ay ! Ségolène, ou la pa konpri navé in bann trèt konmsa dann out bann, don ? In bann fèy vakoi koup troi koté ! Sof ke, trozour, mi rouv mon radio épi kosa mi antann ? Ou ossi, ou té i pans goumant lo smic ziska i trap 1500 ëro, laté pa réalist, ou téi kroi pa sa, épi pa riyink sa : ou té près pa dakor avèk programm out parti. Solman, ou la bat tanbour la dsi, ou ! Avèk sa mèm, ou la fé z’apèl pou fé vot pou ou ! Oté, Baya !
Ashté inn, vand dë ! Vandèr la kours ! Vandèr la fimé ! É nou, èk nout ti-biltin papyé rosiklé ? Kosa nou la fé ? Inckroiyab, mé vré.

Justin