Mézami, mi koné pa si zot i koné la rass vandèr la fimé mé lé intéréssan d’savoir. Pars vandèr la fimé sé konm in vandèr d’rèv. Li néna arienk sa pou vande é si li tonbe dsi in ashtèr d’rève son kapassité, son talan sé d’vande ali sa.

La plipar d’tan in pèrsone rézonab i ashté pa in n’afèr konmsa sof si sa lé akonpagné d’in bande zoli parol. L’èr-la, la pèrsonne i mète a révé, èl i oi èl rish a kou d’milyon, apré amenn in vi d’shato : lo roi la pa son kouzin.

Tout i roul bien ziska ké toudinkou, la fimé i anvol, lo rève i évapore, é lo promèss inkroiyab i shanj an promèss de riyin ditou. Ala pou kossa mézami i fo méfyé zoli-zoli parol de moune é mazine a shak foi, sa in manyèr roule lo moune onète dann la farine.

Alé ! mi kite azot rofléshi la dsi é ni artrouv pli d’van. Sipétadyé.