Na poin tro lontan, Elie Hoarau la roganiz in konvèrsasion avèk bann zournal déssi la késtion la faim déssi la tèr, épi bien sir, li la donn inn-dé l’idé pou La Rénion épi pou nout bann voizin loséan indien... li la di konmsa, alon rolans lo ko-dévlopman avèk nout bann voizinaz, d’ot shoz ankor, épi li la domann pou kossa i arkomans bann zékspérians déssi lo plantaz do ri, par rapor nana in bann kalité nouvo kalité do ri.

Ala tout in bann martin anrazé la sote déssi son vant pié-zoin. La di konmsa, lo péi lé tro pti, plante do ri partou nora poin assé la plas pou donn manzé toulmoun. La di ankor, koud zargo kok malgash lé ankor fré, lo san la pankor kayé, i vé ni sava gingn malèr ankor in kou èk banna. La di ankor kapitalis i sava koté z’ot larzan i fé bien pti. La di si, la di la, gasparin-brinet-brinet-gasparin...

Alor, fé lékspérians ossi la pa bon ! Alor, fé la somans pou vann la pa bon non pli ! Lo kodévlopman, i fo pa ! Diskité, i fo pa !... Lans mové parol, sa, sa lé bien bon ! ; Koz la boush ouvèr, lé bon !
A romarké, ni pé touzour shant lo shanté Maxime Lahope ki di konmsa : « Vann do sik ou nora dé ri, vann do ronm nou nora tissi, vann léssans zéraniome, kan sa va rotourn isi sar médikaman ». Sépa si sa va nouri nout vant ?

Justin