Mé zami, mi koné pa si zot la suiv in pé l’aktyalité dann moiyin oryan, mé d’apré sak bann télé i di : l’afèr laba i san pa bon, i san kaziman l’aye. Mi sort antann dir l’armé l’amérik la fine désid atak l’Iran dsi sinkant dé poin sansib pars d’apré lo létamazor bann zamérikin néna sinkant dé poin l’Iran lé frazil.
Sinkant dé mé zami ! Zot i souvien Achille l’avé in sèl poin frazil é lété son tandon i port lo mèm nom é si ti toush ali dsi so poin-la avèk in flèsh sansa in n’ot z’arm ou i tyé ali. Mi rapèl i paré li la tonm dann san dragon é sa la rann ali invinsib. Sof in l’androi, koté son shoviy, in fèye la rèss kolé épi la tir son l’invinsibilité. Donk lété posib tyé ali é sé sak l’arivé !

Bon sak l’ariv achille l’ariv ali, mé sinkant dé poin pou mète l’Iran a z’nou.I étoneré amoin bann zamérikin i sar fé sa. Biensir zot i pé fé sote la vi in zénéral arienk an pyézan son téléfone portab mé néna lontan i fé sa, mé rèye l fors l’Iran an sin kant dé bonbardman ? Mi di pa lé in posib mé pandan stan la, L’Iran i lir zoinal kosa. Mi sort antann lo péi apré intèrpèl mésyé Trump pou mète ali o défi-in défi danzéré.
Pars l’Iran néna zami li osi épi son zami i éspyone bann zamérikin konm l’amérik néna zami iéspyone bannzami l’Iran. Astèr si i ariv sak i apèl lo poinn non rotour, kosa va éspasé ? Mi koné pa pou vréman mé la pa d’bone shoz pou l’imanité i atann anou.

Romark moin la touzour antann dir mésyé Trump té in marshan kravate é li la vni milyardèr avèk sa. Mé zot i kroi vréman vann kravate épi diriz in gran pé sé topète morète zot. Moin pèrsonèl moin néna in dout dsi la késtyon.

Nb in pti provèrb pou fini : kan dé zéléfan i bataye sé lo zèrb ké lé krazé.