Mé syé zé Médam, la sosyété, koz èk moin sé koz èk in kouyon. Mé sé o pyé d’lo mi k’i oi lo vré mason. Kozman-la i fé pans amoin l’inégalité dann la sosyété. Sak lé an-o i sousyé pa sak lé an ba, sak lé an-ba i koné près spa sak lé an-o. Sak lé intérésan dann provèrb-la sé lo konparézon rant dé kalité d’moun, sak néna lo vant plin é sak néna lo vant vid. Sak néna lo moiyin pou moiyéné é sak na poin lo moiyin. Mé zami, dopi 1946 La Rényon lé départman fransé. Dopi 1998 nou néna l’égalité sosyal-néna mèm i loi dsi l’égalité réèl - é zordi ankor néna d’moun pov mèm tré pov é d’moun rish, mèm tré rish : zot i pé pa di amoin sa in l’ord natirèl sa ? Zot i pé mèm pa dir amoin sa sé in l’ord pars fansh vérité, sé in dézord plito. Alé ! Mi kite azot rofléshi la dsi é sirtou dsi la fason i fo ni fé pou ansort anou. Ni artrouv pli d’van. Sipétadyé.