Mi pans, konm moin, zot la antann parlé kék troisan pèrsone la fé in rényon isi. Demoun téi sort shé nou, téi sort l’il Maurice, épi d’ot péi ankor pou diskite dési lo dévlopman dirab épi sèy fé in kopérasyon rant bannzil l’oséan indien. Pour sir, in bon n’afèr. I fo rokonète sak i pé ète bon pou lé z’inn épi pou lé z’ot. Krétiké, krétiké, sa la pa in bon mazigador.

Mé désèrtènn foi, i vo myé ète in pé modèst épi sirtou i fo pa obliy sak nou la fine kasé-mi di nou, mé sé sirtou l’antant rant la bann Didier Robert épi la bann Michel Vergoz. Nou na lo tan pou arvizit tousala épi si lé nésésèr mète lo né in pé dann zot malproprété.

Zordi mi vé solman anparl in kozman moin la antann dann télé. Lo boug téi parl nout l’avans dann domenn lénèrzi par raport l’il Maurice. Moin pèrsonèl, kan i di in n’afèr konmsa, mi sar ésèy vérifyé é kosa mi lir : l’il Maurice i aviz l’otonomi dann l’énèrzi pou l’ané 2028. La Rényon pou l’ané 2030. Kisa lé an avans ?

L’il Maurice la lans in gran projé la klimatizasion avèk lo d’mèr froi dann la réjyon Port Louis épi lo sid. La Rényon la lans son projé swap pu klimatiz bann batiman piblik Sin-Dni épi Sint-Mari. Kisa lé an avans ? Nou va oir, sirtou ké isi désèrtènn foi, poul i kakaye mé i ponn pa.