Kosa nana d’méyèr ?
Sak i sort déor byinsir !
Zot i koné goyav de Frans épi tout sak la poin la-ba mé k’demoun la batiz konmsa, sé sak lé bon mé zami, sé sak lé fantézi.
Nou Kréol, tout sak ni fé lé pa bon pou nou, tout sak i fé déor, aŠ ! sa lé ékstra, Baya !
Nout mèb tradisyonèl, sa i vo pa aryin ! Mèb linportasyon ? Sa oui !
Nout manyèr manzé lé mèm in pé danzéré ! Byin manzé ? Sa i aprann dann télé : dan la piblisité i mank pa, fèyton i rann aou myé édiké !
Nout manyèr kozé, sé koz an barok ! In bon kozé, sé kozé fransé !
Nout kultur, ki fouti kultur ?
Nout mizik, dizon la mizik sovaz !
Nout litératir ? Ousa na sa isi ?
Lé vré : dann manyèr viv in pèp, dann son manyèr travay é dann son lidé déssi la vi la pa tout lé bon. Mé la pa tout lé mové non pli. Na dé shoz i ral anou an aryèr, alor i fo ni réflèshi koman ni doi shanz manyèr.
Mé kan in n’afèr lé bon, kan i mète anou anlèr, akoz nou va abandoné ? Akoz pratik lémitasyon ? Ni gingn pa, nou, kalkil nout ka par nou mèm ? Oir par nou mèm kosa lé bon pou nou é kosa lé pa bon pou nouŠ ?
Tansyon pangar banna lé riskab lav nout tèt par anndan, fé pèrd anou nout pèrsonalité, fé oubli anou nou lé Rényoné.
I vo la pènn vanzé pou sa ! Sa lé byin vré ! Vanzé pou ète plizanpli Rényoné !

Justin