In kozman pou la rout

Alala l’afèr ! Ala lo gran konba rant la boté é l’itilité. Mi koné d’moun i vé pa z’ot madam i plant flèr dann zardin pars, sanm pou zot, flèr sa i manz pa-é dir k’koméla nana dé moun i amontr aou manz flèr, mé z’ot kozman la pankor rant pou vréman dann la tèt toulmoun. Lo vaz a flèr sé la boté é lo po d’shanm sré l’itilité : pars mazine azot si i fé noir, si i fé fré, lé dir alé déor pou sak zot i koné, kisoi lo pti, kisoi lo gro ! Po d’shanm té bien nésésèr avan k’bann mézon modèrn la vni bouskil nout manyèr viv. Tou lé ka, lo kozman i mérit in réfléksyon filozofik : lo bo lé itil sansa lé initil ? L’itilité lé zoli o sinonsa lé pa zoli ? Na d’moun la ékri bèl-bèl liv la dsi. Déza Platon dann son banké té i invite demoun son tan pou réfléshi la dsi. Anon réfléshi nou osi ! Alé ! ni artrouv pli d’van !