Mésyé, Médam, La Sosyété, koz èk moin sé koz èk in kouyon-mé sé o pyé d’lo mir k’i oi lo mason. Kozman moin la mark po zordi i parétré sa sé in provèrb l’Afrik, mé i pé z’ète vré pou La Rényon dann tan, konm vré pou in bonpé d’moun néna poin dolo kourant. Dann tan, konm zot i koné l’avé poin lo kourant é la plipar d’tan téi falé alé rode dolo é sa té in vré korvé : kisoi alé rode dolo la rivyèr, kisoi dann bassin, kisoi ankor la fontène dolo... Sansa zot i pé galman anpar bak pou trap dolo i koul dsi lo toi. Mé anpar bak lé posib, sof si lo fouti plui i rofiz tonbé konm i ariv tazantan é mèm souvan dé foi. Donk la sazèss i komann pa vèrs out bak dolo, mèm out rozoir té i fo pa vèrsé. La sazèss i komann ramass out lo é sirtou pa zété pars ou i koné sak ou i zète é ou i koné pa kan nora d’ot. Alé ! Mi kite azot rofléshi la dsi é ni artrouv pli d’van. Sipétadyé !