Médame zé méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami, mwin l sir zot i koné kozman mwin la mark an-o la zordi épi kossa bande léktèr témoignaz i koné pa ! Zot i koné do lé antouléka. Zot la sirman fine suiv ali kan li lé dann kastrol dsi l’fé. Li bouze pa, li gonf pa, li ramass lénèrzi épi d’in kou, san k’wi atande li monte an boi sinkante é si ou lé pa vif, an in néstan li la fine vèrss dann fé.

Parèye dann in n’afèr ou pou in moune ou la poin konfyanss : vèye ali oute dé zyé rouvèr é porte antanssyon pars kan wi atande lo moinss li lé kapabe roul aou dan la farine. Alé, lé sinp, mé lé konmsa ! Antouléka sa i pèrmète amwin mète azot an garde é angante azot pou porte antanssion sak zot l’apré fé.

Alé ! Mi kite azot pou zordi éni artrouv pli d’van. Sipétadyé.