Oté

Vi épi antandi d’isi-d’laba, d’isi d’laba

Justin / 24 mars 2020

JPEG - 43.6 ko

Yèr moin la parl in konfrans de prèss isi La Rényon dann la proféktir é moin la romark sirtou tout lo létamajor i diriz la bataye kont lo Covi 19-isi La Rényon-na poin inn lé né dann lo 97-4 é azout avèk sa lo lékip l’avé l’èr in pé fatigé sof zot fish do pèye lé konm téi di avan in pé graé-graé… Donk, par l’fète mi sort suiv dsi télé-Moris in konférans de prèss é sof si moin lé movèz foi puisans 12, sansa si moin lé konpléksé par rapor nout bann kouzin konférans-la l’avé in méyèr téni.

D abor l’avé in minis la santé morisien bien antandi, in minis lékonomi parèye, in résponsab la sékirité parèye galman, in diréktèr la santé marmaye la kour, épi l’avé Dr Gaud bien koni isi pou la lite kontr lo Sida. L’anbyans i shanj dann in ka konmsa é si lé vré zot osi zot lé dann danzé avèk lo korona virus lo sèryé lété pa lo mèm ditou… Lèss amoin dir azot kékshoz, la pa ké lo létamajor moin la anparl lindi li l’avé poin lo droi d’ète la, mé mi pans lété posib si téi vé mète dann lékip inn-dé zékspèr rényoné.74 zané apré la loi 19 mars 1946 noré té posib. Zot i pans pa ?

Aprésa mi vé dir azot in kozman moin la antann dann in radyo pèrkal : té in moun téi vé vanj kont lo koronavirus avèk in pomad i ansèrv kont la grip. Akoz pa ? An touléka lo lanimatris téi vé pa ékout ali é sirtou té i vé pa donn son linformasyon in note léksélans é sa téi énèrv ali. Alor li la di in kékshoz moin la trouv inportan. Li la di li lé La Rényon dopi dé zané é dé zané mé i fo pa prann ali po in inbésil pars li sé in zorèye é sak li di i fé ké son kozman i pèz lour.

In n’afèr moin la romarké : avan lo lépidémi téi fé vnir bann éspésyalis bann plant isi La Rényon pou domandé kosa i fo donn pou géri si, géri la, géri vite, mé dopi la kriz mi oi pi zot. Pétète an o-lyé i konsidèr azot konm zéro la gosh in shif. Forsé zot lé né dann 97-4 é forséman sa i done pa zot in léspèrtiz in portan…A ! o fète, moin la parti dsi lo site l’express Madégascar é kosa moin la lir ? Moin la lir bann laboratoir i intérèss lo ravinsara-katrépis pti fèye - konm in baz pou soign lo covi-19 é pou oir si i pé fé in vaksin. Mon bann frèr malgash, mi koné pa si zot néna rézon, si zot i tienbo lo bon bout mé tienbo larg pa. Zot sivilizasyon néna dé santène zané é zot konésans tradisyonèl konm zot bio divèrsité, konm i di, pèrsone na poin lo droi krash dosi.

Mi arète la, sinploman pou fé mon bann romark movèz foi é pou dir bann léktèr Témoignages sak moin la vi d’isi d’laba-d’isi d’laba.. In n’afèr pou fini : moin la lir in kozman in moun 97-4 téi di konmsa : lé vré néna arienk Pol Vergès lété kapab fé réspèkt anou isi. Bon kozman ! Vérité san pour san. Alor dann in ka konmsa ni pé poz anou la késtyon : kosa Paul Vergès noré di dann in kriz konmsa ? In bon késtyon sa ! zot i pans pa ? Na rovizité !