Matante Zélida la ékrir Justin :
Mon shèr nové, na in n’afèr moin la anvi dir aou ; shak foi, lé déssi lo bout mon lang, épi mi obli dir. Fransh vérité, dann gouvèrnman, na in pti bononm mi èm bien. Ou i oi pa kisa mi vé anparlé ? Mi vé anparl méssié Yves Jégo. San farsé, sa sé in boug i mète dé pik tout bann rouz-de-fon nana dann la politik La Rénion. É ! Banna lé an pène avèk li ! Mi di aou, li va drèss z’ot kot !

Justin la fé aèl pou répons :
Mon vié Matante, sak mi èm avèk ou, sé out manièr koz la boush rouvèr. Ou i anparl amoin Yves Jégo, l’èr lo boug l’apré gingn koud’ kongn.
Li la domann la Rézion kossa èl la fé avèk larzan la mobilité, é bin la réponn ali, mé la di ali sé in goût dolo dan la mèr. Li la fé lo rodomon, épi li la di li va partaz lo larzan par li-mèm. Dopi, pi d’larzan, pi d’partaz, épi li lé konm martin "ki kouzi !"
Li la di : li va domann madame Dindar armète anlèr son parti. Kossa l’arivé ? L’UMP i anvoy in fran gouyav de Frans pou fé mission-la. Astèr, ni antan pi ali !
Li bate karé partou èk son prozé loi program. Li vé k’i fé vite. Son minis, Mam, i amar zèrb pou bate ali atèr ! Vié shat i èm souri tann !

Justin