Néna sak i koz toratravèr si nout parti. Tanto i di, i mank a nou touzour lé dé bout plis lo milié, souvan-dé-fwa lo bann komantèr na ni ké ni tèt, mé i bat la lang tankipé si nou. Dopi dimansh néna dé kwa aval la bil. Ala ni sort rorganiz in rasanbloman sint sizann-bokaj. Nout la pa mont si lo twa la kaz pou anonsé, nou la pa fé tapaz la d’si nonpli, nou la ziss donn lo mo rantronou. Konmsa, dapré zournal lavé 800 kamarad la bouzé pou v’ni ékout nout bann dirizan anons nout program pou domin é apré domin. La sal Rwa-Caf té i débord. Pou mwin pérsonèl té Bandé.

Kisa néna in vré program pou nout péi ? Sak néna lèv lo dwa. Mé in prozé i tyinbo byin la rout. Nou na pwin lo tan zordi parl a zot tout propozisyon nout parti, néna 25, dopi travay, kiswa travay dann privé, kiswa travay fonksyonèr, ziska lozman, i parl kann osi, bann plantèr kann, zot kanar lé nwar apré 2017 i prétan, tousala lo parti la prévi. Sak i gingn inn ti moné zako, nout prozé i provwa in goumantasyon. Néna pou la rout, pou radié, pou lékol, pou vié moun. Néna osi pou mèt an lèr nout kiltir è knout lidantité, nout kozé tousala. Nou dwa romérsié nout bann kamarad la travay la d’si.

Nou lé abitié, sovan-dé-fwa pran tou sak i sort déor, sépousa lèrkilé nou lé dann in tramay mé zordi nou néna in vré prozé, fé par nou minm, in prozé rényoné fé par rényoné, pou rényoné. Ki mié ké nou minm i pé konèt omié nout péi ? Mwin lé sir désértin i sar tiliz nout prozé san domandé. O lièrk inn dé i vol nout zidé anndan la, na mèt gran rouvèr si la tab, konm sa i ansèrv nout tout. Konm in kamarad la di a mwin dimansh, rant in boushé zanbrokal èk dé rondèl sosis li di a mwin « vik ryink nou néna lo plan, sanm pou li, a nou minm va fé !