Travay lé dir pou an avoir : in pé i anvoy domann par dsi domann. Mèm la répons na dé foi, zot i gingn pa... zis in pti répons pou dir o moin la rouv lanvlop épi la louk in pé out lète. Alor ou i donn out nom l’ANPE, l’ASSEDIC : i paré inn ansanm l’ot, koméla, sé topète-morète. Atann li ! Éstaz li ! Antrotien li ! Lo tan i pass.

La pasians, a s’ki prétan, i guéri la gal. In zour ou i fini par gingn so travay ou l’apré rodé dépi si tan tèlman lontan. Oté ! La ou lé kontan ! La ou lé fièr ! Ou i marsh pi déssi la tèr, ou lé dan lé z’èr. Toulmoun lé bo ! Toulmoun lé zanti ! Travay, sé in plézir ! Si i fo, mèm lo zour konzé, ou la anvi d’travay. I roul ron !
I roul ron ? Pou in pé, mé pa pou toulmoun. Tout travayèr lé frèr ? Souvan, mé pa toultan ! Patron i konpran lé shoz ? Souvan dé foi, mé pa dann tou lé ka ! É kan i roul pa ron pou ou, kan i rod dézord èk ou, kan ladi-lafé i marsh a krazé, zéklèr, ou i oi zéklèr !

Ou i koné pi kan ou i ariv dann baro travay si i fo rantré, si i fo shap avèk. Ou lé an pilul doktèr i donn aou, ou lé an kashé ou l’ashté la farmasi, mèm dovinèr ou i sava oir... kan ou lé a bout.

Plis i sava, plis lé pir, moin ou la anvi alé travay, ou i pèrd somèy, ou la pi fin, ou lé konm poul sinon kok la gingn la pépiy. La tristès i rant èk ou, déssèrtèn foi, out kèr i singn. Ou i koné pi koman sort dann malizé, dann traka, dan lantonoir. Konm in bonpé travayèr, ou lé viktime la violans dann travay !

Justin