Zot i koné l’Espagn ? Sa in gran péi l’Erop, mé lo pèp na in maléré sor zordi, vi k’la kriz i fé déga, i fé ravaz. Shomaz talèr lé osi for ké La Rényon, sirtou shomaz an parmi la zénès. Gouvèrnman i fé pa d’détay : li diminyé bann salèr, li koup bann pansyon, demoun sak i gingn i sov pou sèy an avoir in boulo dan d’ot péi. La kaz lé an vant, mé d’moun pou ashté la poin. Mèm bann vilaz lé an vant, é désèrtin foi pou lo pri in apartman. In légzanp ? in vilaz dan la Galis, an vant pou san dis mil éro.

Laba dan la Grès, sé bann zil lé an vant. I paré l’émir lo Katar i sort ashté uit, pou son troi madam èk son vinn-kat zanfan. Zot té i kroi arienk bann klèb foutbal té i intérès ali ? Figir azot, bann dépité z’Alman, mèm in minis la konsèy gouvèrnman lo péi pou ké li vann son bann zil, konm sa li va gingn ranbours son dète. La pa bézoin dir azot, dann in bon pé so bann zil, nana lo patrimoine lo péi, dann tan la Grès té in gran péi dan la mèr Méditérané, dan lantikité épi in pé apré.

Ankor in n’afèr : in gran vil l’Amérik, Détroi, l’ansien kapital lotomobil, i sort déklar fayite pars li vien pi abou pèy son dète épi aplik in bidzé plizoumoin korèk. I fo dir galman, dann promyé péi di mond pou son lékonomi, mèm lo bidzé fédéral lé an difikilté, par rapor in ralé pousé rant bann répiblikin épi lo prézidan Obama. Parl pi l’Éta la Californi an fayite dopi ké lo kamarad Didier Robert lété gouvèrnèr. Zot i koné ali, mi pans ? In sèrtin Shwartzeneger... mi pans li na dé shoz pou dir lo bo Didier dann koin zorèy, konm par égzanp koman i mète in réjyon dsi la paye.

Katorz zilyèt, mésyé Hollande la donn in konférans de près épi li la di : "La ropriz lé la !". D’ot avan li l’avé di : "La kriz lé déyèr nou !". Moin lé a d’mandé si in pé, konm di lo kont, i konfonn pa zot dovan èk zot déyèr !

Justin