Somanké yèr zot la rogard in bon éspéktak dann z’ot komine sansa dann in komine zot néna z’ot frékantasyon. Somanké, zot a réinir par-la é zot la manz in bon manzé zot la pa péyé. Pétète zot la vèye in fé dartifis é konm dann tan lontan, kan lo bann zétinsèl i tonm, zot la kriy : « Grinn mayé ! ». Sirman sa la rapèl azot z’ot bontan.

Zot bon tan ? Mé lontan téi fète pa vin désanm-la. I paré mèm inn-dé group famiy té i avans ziska dsi l’bor shomin avèk z’ot bob, z’ot batavèk épi z’ot kayanm. Moin la mèm vi désèrtin l’avé in sintir rouz garoté konm in sintir. Aprésa zandarm té i vien épi la bann, si èl la pa parti o maye, èl téi rotrouv aèl o post ziska lo soir. Inn-dé zouar bob té i pass in pé dann lo banzékar épi téi shant. A ! Téi shant ! Kosa zot téi shant ? In shanson té i di konmsa : « Sarda la donn anou la libèrté ! Viv la libèrté ! » épi d’ot shanté ankor – lo mèm téi shant zourné mardi gra.

Kèl shomin nou la fé dopi tan-la. Kèl shomin pou amenn in gouvèrnman désid 20 désanm fèryé. Ala ké mi di nou ! Mé nou sé kisa ? Nout parti kminis rényoné, sa lé sir ! Sindika CGTR, sa lé sir galman ! L’inyon dé fam La Rényon. Bann zorganizasyon jenn konm l’ODJR, lo Corj, lo Fjar épi bann pèrsone progrésis sa lé sir ! Arzout èk sa bann zartis !. Arzout ankor in pti ta par si par la.

Mé sak i fé zordi lo vèr dann désèrtinn komine, épi dann bann z’asanblé, laba la proféktir kosa zot la fé sansa manz grinn zak i sort dann fé zot la pa fé griyé, zot la pa tiré non pli-zot la mètte lo pyé dsou la tab ! Mi pé di arien !

Fé pète gran-gran fé d’artifis ! Roganiz bann gran konsèr ! Fé diskour mèm-la plipar d’tan an fransé. Sak mi pé dir azot si nout pèp la mont plizyèr marsh dann la kiltir, la pa zot l’otèr. La pa zot la ankourajé ! La pa zot la gingn anpéshé. Sé nout pèp rényoné la gingn arash in kékshoz konmsa – kékshoz v’amenn ali pou fini la konstriksyon son l’idantité é pou gingn son résponsabilité ousa li lé, dann l’oséan indien, an parmi nout bann voizin natirèl.

Vin désanm sa la pa in fète komèrsyal, sa la fèt la viktoir kont in sistèm inimin pou rouv in pé la port la libèrté an atandan plis an atandan myé.