L’èr-la mi poz amwin késtyon : koman in magazin i pé an avoir vinmil produi ? Zamé d’la vi in kliyan, mèm an famiye, i pé avoir dann son kaz in gran kantité référanss konmsa. Si l’avé di amwin kéksantène, mwin noré di lé possib, mé in kantité konmsa i kass mon pate in n’afèr konmsa.

Mwin la pa bézoin toussala pou viv é mèm mwin lé a d’mandé si sa i fé pa plito mon malèr. Pou in péi konm nou, wala in rézon pétète ni gingn pa dévlope noute péi. Si lé vré ké la sossyété d’konsomassion i fé noute malèr par son nonb produi.

Néna poin lontan mwin la lir dann zoinal in groupe l’antropriz la assossyé pou vann bann produi zot la désside fabriké. Zot i panss konmsa zot nora in l’offre pli konsékan é konmsa zot va nyabou vann pou lésportassion.

D’in sanss mi konpran kossa zot i vé : sé zot ossi propoze in kantité produi pou atir lo kliyan dann bann péi déor. Mi konpran ossi sak i vann bann produi néna bonpé la valèr : konm kafé bourbon pointi, konm lo thé blan, konm kakao, konm kirkima, la vaniye épi son bann dérivé, bann tizane galman. Mi konpran bien bann moune-la lé déssidé kroiz lo fèr avèk bann l’ inportatèr

Mé mi poz amwin késtyon kant mèm, sirtou si néna toute in lorganizassion pou pa vanj égal-égal avèk bann péi l’Érope… Mi di pa dann toussa, néna in pé v’ariv arpa réissir, mé mi doute in pé pars anpliss si zot la poin la protékssion k’i fo, la vi pou zot lé riskab d’ète dir.

Sa i anpèsh pa mwin souète azot in bon kouraz… a bon antandèr, salu !

Justin