Méssié Borloo, minis lékolozi dann gouvèrnman la Frans, i sort fé konèt bann désizion li vé pran pou in méyèr lanvironeman. Total-kapital nana sinkant mézir : Anparmi, li vé dévlop bann lénèrzi ronouvlab konm solèy, le van, la mèr, la biomass, la zéotèrmi... ziska pran part pou vin pour san dann lénèrzi la Frans la bézoin.

D’apré sak li di, li vé mèt la Frans dakor avèk protokol Kyoto, épi amontr lénèrzi prop i pé ète rantab pou lékonomi. I pé dir son lintansion sré a pépré korèk. Sof k’i kontinié avèk so tik-tak lénèrzi nikléèr, so vré tablatir pou limanité... mé nou va arkoz déssi sa.

Sak mi romark zordi, sé k’banna nana lo shoi, mé nou, bann zil, nou na poin lo shoi pou vréman. In kèstionn vi ou d’mor ? Anon pa di sa, mé si ni vé kontinié viv déssi nout bann ti-galé a pépré konm k’i fo é an avoir in vi a pépré korèk, ni pé fié arienk déssi lénèrzi prop....

Kan la-ba i kont kou d’vin pour san pou lénèrzi prop, issi nou lé blizé kont près kou d’san pour san... sa i fé in gran diférans, rantre nou !

Justin