Vinkèr toute katégori : Bande zidé Paul Vergès !

Pou sak lé rokalé, néna band rokalé+ é néna band rokalé – mé néna in kozman Nelson Mandela i fo zot i rotien : « i pèrde pa zamé, i aprann ! ». Pou sak la gagné sansa lé kalifyé, bravo mé antansyon lo kapitol lé zis kosté ansanm-avèk la rosh tarpéyène.

Donk, ala mon pa d’porte, mon kozman pou zoinal lindi 13 jyin 2022 :
Mon kozman pou dir azot zordi sé sète-la : la kanpagn lété tro kourte mé mèm si èl lété tro kourte ni pé dir nou la antande in bon bataye zidé pars shak gran sobatkoze zétélokzyon la fé avanss bande zidé pou La Rényon. Band zidé in pé klandéstin la sorte dann gran féklèr é ladan nou la fé noute triyaz pou oir kossa lé bon é kossa lé folklorik. Kossa sé in solission d’fon é kossa i vo arienk pou in pti pé d’tan-konzonktirèl si zot i vé.

Mé an parmi band zidé d’fon ni pé di, san k’i pé apoerte anou la démanti – sèryèzman - band bon zidé pou La Rényon épi band rényoné sé band zidé nout parti kominis rényoné, donk band zidé Paul Vergès, vinkèr par KO d’in boute a l’ot lo band sobatkoz. D’in boute a l’ot la kanpagn, mèm in pé avan, é lé parti pou in rotournaz zénéral lopinyon piblik dann noute péi.

Mi sava pa rodi band zidé-la, pou linstan, mé mi pans noute band léktèr lé déza o kouran é plisk’o kouran…mé mi di pa na pwin nouvo zidé zot lé intéréssan galman mé la baz sé sak mwin la fini di : band zidé nout parti, band zidé Paul Vergès. Alor zot é nou band porte-parol ni koné oussa i fo ni sava dann la bataye zidé é ni koné ossi ni sava gagné é lo zour lé pa loin toute rényoné i yèm La Rényon va rotrouv azot pou fé sorte noute péi épi nout pèp dann malpassé.

A bon ékoutèr, salü !

Justin

Nb Alé rogard dsi zot téléfone « Capitole é rosh tarpéenne » i mank ar pa done azot band bon zidé pou guide azot dan la vi.