Débi la rantré sé la mor Shana, ke la mark à nou. Aprè sa la pi arrété di tou. Somène passé, la zistis la lans in lankèt pou lo viol in fi i sava kolèze. Marmaye y jèt galé gratuiteman dessi domoun, na in madam 25 ans lé mor ièr. Talèr la prison sra rempli ek minèr.

Vréman nout sosiété lé malade. La zistis va fé son travaye, mé y fo la sossiété osi y fé la siène. Y fo rode la koz so maladi la, parse li va fini par détrui toute nout bande zène marmaye. Kossa la spassé pou ariv la ? Kossa y fo fé pou arèt sa ? En tou ka lé irzan.

Na marmaye lé violan, é na sèt lé violanté. Moin la rapel à zot zistoire la spassé ek lassistante maternel y tape inn ti zanfan dé zan. Zot la entendi lo prof eps la tape in Zélèv parse lo zéléve la rire kan li la gingn in coup d’galé. Zot la entendi osi lo sirvéyante lékol Salazie la tape in marmaye 10 ans. Dan lo mêm somène in boug y fonse dessi kolézien ek son loto. Mi oubli sa spé.
Mé oté la osi lé pa bon. I doi pa fé zistis ou mêm, fonse dessi marmaye ek loto par ekzanp. Y doi pa profite in pozission dominan pou abiz dessi lo pli pti. Dann lékol, ou o zabor, na poin personn na droi tape marmaye. Ladsi, ni doi avoir in tolérans zéro. Pa kestion lo pli gran y itilize la violans pou règ in sitiassion. Satiman Korporel lé interdi par la loi é sa lé pa in métode pou édik zanfan. En tou ka, sé pa in modèle lédikassion konmsa nou vé pou nout zénès.

Ni artrouv.

Justin