Méssyé, médame é méd’moizèl, onorab sossyété, mi sava rakonte azot l’istoir méssyé Vital Nduwimana in plantèr tomate dann in péi l’afrik i apèl Burundi. In péi assé avanssé, mé demoune La Rényon i koné pa bien é lé domaz. Domaz, pars sansa zot noré pi fère la konésanss ansanb méssyé Vital Nduwimana...Vital i plante tomate dann Burundi é toute son rékolt li fé sa dsu troi moi-avan li la pwin,apré li na pi- kan tomate lé bon marshé é li na prèss pi arien pou vande kan tomate lo pri i rogoumante, dopi moi d’désanm ziska moi d’févriyé. An pliské sa, la moityé son prodiksyon i gate o pyé pars li la pwin in bon méte pou konsèrv son pome d’amour-kome i di la-ba an parmi noute kouzin morissien.

Donk in zour, li désside, sa sé in n’afèr i pé pa diré. I fo li trouv in tik-tak pou konsèrv son tomate : pa in métod shimik, pa in métod pou fé gingn son produi rofroidisman. Rozman, sé pa sak li vé, é li la pwin moiyin pou fé in n’afèr konmsa. Mi diré orèzman ! Donk li sèye plizyèr trik : lo sho li, lo fré li, solèye li épi d’ote métode mi rovien pi. Mé souvan dé foi, sépa si Bondyé i mète la min, sanssa lo azar i fé bien lé shoz. Donk, in zour, li romark par koté son touf fig-banane si zot i vé !-in pé tomate la tonbé é la rèss la, tèl ke sé, bien konssèrvé dopi in bon koup de tan... Kan li rogard pli pré, li an apèrsoi tomate la pa gaté lé dan la sann. Pétète la sann sé lo solissyon li l’apré rodé ?L’èrla, li déside vérifyé son l’idé. Li pran in bonpé la sann, li tamiz bien épi li mète sa dann boite karton épi tomate anndan. Rézilta ? D’apré sak moin la lire, méssyé médame,médmoizèl, onorab sossyété, l’afèr la marshé é son tomate la pi gate in kantité. Si tèlman li nana pliss tomate pou li ariv a vande in pé kan lo pri lé for.

Kriké ! Kraké ! la klé dann mon posh la taye dann out sak. Astèr apèl boug-la mésyé. Pars avèk son vant tomate, li la nyabou plas son l’arzan dann tout sort kalité l’aktivité konm komèrs, konm réstoran épi d’ot z’afèr ankor. Myé k’sa li la amontr son konéssans lo bon téknik pou konsèrv tomate épi zot ossi la nyabou gonf in pé z’ot pla, épi l’moune nana plis tomate pou zot fé kui z’ot manzé tradisyonèl.

Justin

NB : Ni pé apèl ali Méssyé pou son trouvaye.