In zour, in vil, dizon in komine té i apèl Mafat ; na in kandida zéléksyon po èt mèr Mafat ; la fini son diskour par Viv Mafat, viv la Frans !
Lo mo « viv » i vé dir nou vé, ou nou souèt lo zafèr i viv, é ki viv bien !
Kan moin té lékol, moin té voi kan i ariv vakans, la métrès i ékri si tablo : « vivent les vacances », e,n,t,si ou plé po lo plirièl an fransé.
Zot la antandi tou sa ; viv intèl, i pé èt in kandida mèr, dépité, prézidan la Répiblik.Viv Babet, viv Vergès, ou viv Débré.
Viv la Rényon, dakor, dakor.
Mé ékout bien lo kontenu lo diskour é ta voir si a la fin, i fo vréman dir viv la Frans.

Oui di laba, prézidan lé antrinn mèt a nou dan… difikilté ; nou té pov, ni res pov ; nou té manz pa a not fin, nou kontinié dépann koli alimantèr ; nou té rod lozman, nou lé touzour po rod lozman.
Nout finn moi té difisil, lé touzour difisil.
Nou giny touzour ti lalokasyon 450 éro ; soi nou pèy loyié, soi ni asèt la nouritir pou nout bann zanfan ! Giny pa fèr lé dé !
Lo prézidan la Frans laba li viv bien, la Frans i viv bien.
Si ti di viv Débré, Débré té i viv bien : mèr, minis, toultan in ministèr, ti kroi li té krèv la fin ?

Alors ké moin, ti kréol la Rényon (Martinik, Guadloup, Guyane, Mayot), moin lapré ral si lé dé bout po arime inn ék lot ; mon granpèr té pov, mon papa, mon monmon té pov, i viv dan la kaz an payi ; 4, 5 zanfan dan in minm li ; a moin mi arral mon gongon d pios po trouv in patat, in maniok po manzé é oui vé mi kri viv la Frans !
Akoz mi kri pa plito : viv amoin !
A moin zot la pansé ?… a la politik, la politik.
Viv a moin don !viv anou ! Zot lé dakor ék moin !?

 Justin