Bien antandu néna bonpé média i done randé-vou zot bande kliyan, é d’ote i di sa la pa in n’afèr pou rogardé é zot néna zot rézon pou di sa. Issi la Rényon néna in zoinal, lo kotidien, i di : « Konte pa dsi li pou anparl de sa ! biensir li yème bien toute kalité léspor épi sirtou lo fout !  » mé si mi konpran bien la fasson lo katar la poze son min la dsu sé in n’afèr k’i plé pa média-la.

Mwin pèrsonèl néna in n’afèr i bote pa mwin dann sète afèr-la sé la fasson la trète bande travayèr émigré, sak i sorte bande péi tranjé. I anons pou fé bande zinstalassion sportif néna ziska 6500 travayèr la pèrde la vi apré k’zot la trime konm zésklav. In sogré rantre nou ,trape zot téléfone épi domande google ransègnman la dsu.Zot i rogrète ar pa lo voiyaz.

Sa sé pou dir azot, zot i koné bien mi apréssyé pa sète afèr d’larzan, sète afèr d’lésploitassion bande travayèr, épi la fasson bande korompu la mète la min dsu léspor.i fo dir mwin lé vyeu jeu é mwin néna ankor dan la tète lo mérite sportif, lo fair-play, lo réspé mityèl é toute kalité prinsipe la akonpagn la vi la plipar rantre nou.

Mé oila, si d’in koté néna sak mi di azot d’in n’ot koté néna lo pli gran tournoi rante bande méyèr nassyon foutbolistik é sa sé in kékshoz k’i ral amwin kant mèm konm i doi ral in bonpé mon bande kamarade... Dé foi mi di lé possib mi ansèrv lo tan la koup mi rogarde ar pa pou ratrape mon rotar d’léktir ; défoi mi di mi pé kontinyé d’ète an rotar dann mon bande léktir épi shoizi inn-dé match pou mwin gardé... Mwin néna in kamarade révolissyonèr, li lé san pityé par rapor lésploitassion bande travayèr, par rapor galman bande korompu, épi bande viktime la korupssion...

Li la di amwin sète ané li rogarde ar pa foutbol é li lé pa anmank zarguiman ;mé i paré,an missouk li rode-rode in pé si li pé gingn biyé pou alé oir inn-dé match pars boudikonte Katar avèk la Rényon lé pa si loin ké sa é sa i spass arienk in foi dann katran épi gate in plézir konmsa ébin lé dir.

Alé mézami, mi kite azot rofléshi la dsu é ni rotrouv pli d’van.
A bon ékoutèr, salu.