Médam zé mésyé, la sosyété, koz avèk moin sé koz avèk in kouyon mé sé o pyé d’lo mir i oi lo bon mason. Mézami, si mi di azot kozman-la, sé pars mi koné kosa mi vé dir, é kosa in bonpé d’moun i pans. Voiyazé sé pran loton l’aviyon, bato, sé marsh a pyé galman mé ziska ousa i sava konmsa ? Loin ! i pé alé loin, mé a bien kalkilé san bouzé nou lé kapab alé loin an rèv sansa an majinasyon. Dopi moin néna mon konésans, souvan dé foi la nuite, mi sava dann désèrtin landroi normalman mi sava pa. Kan ou i majine in famiy mor é ké ou i sava arzoinn ali an majinasyon, ousa ou i sava ou la ? Ousa ou i lé ou la ? Momandoné, ou lé bokou loin ! Kan ou lir in liv, sansa kan ou i rogard in fime, kan ou i antan in zoli shanté, toultan ou i voiyaz mèm é san dépans milyon. Ou i voiyaz dann tan, dann léspas, dsi la tèr é mèm pli loin dann fon la mèr épi défoi galman nil par, dann plizyèr dimansyon an mèm tan voiyajèr san bagaz.. Alé ! Mi kite azot rofléshi la dsi é ni artrouv pli d’van.sipétadyé.