Sa lé vré pou tout zoizo. Kisoi dsi la mèr, kisoi dsi kap, kisoi dsi pyé d’boi, kisoi dsi la tèr zot i fini par pozé. Sa sé z’ot déstin, é na poin arien pou alé kont sa. Mé konm sé in provèrb, lo sans i dépass bann mo konm d’abitid. Biensir provèrb l’afrik la i adrèss sirtou épi an promyé la sosyété bann z’imin. Pars, ni konpran bien sa in kékshoz i konsèrn l’imanité ninport ékèl péi-pou ramenn azot in pé dsi la tèr. Zordi ou lé inportan, ou lé srish, ou néna la puisans pétète mé momandoné kisoi domin, kisoi apré domin ou i fini par pozé par vni in moun konm in n’ot. Parl pi kan la mor i ariv, zour-la tout demoun lé parèy. Alé ! Mi lèss azot rofléshi la dsi é ni artrouv pli d’van. Sipétadyé !