Dopi kinz zour volkan i koul san rasazyé, pou sak i vé, li donn a nou réndévou konm li donn randévou bann touris déor. Kèl éspéktak ? banna lé ansanté parl pi koman, lé rar war volkan konm sa, donkalor sak i pé, i anprofit. Dopi kinz zour i an parl de sa dann télé, dann radio kiswa isi minm ousinonsa déor, boudikont, sé in gran piblisité pou nou, pou la Rènyon. Piblisité pou invit bann moun déor vni war nout volkan, minm lokasyon pou rann a nou vizit, i fé plézir.

Bann organizatèr voyaz la rézon i lish lo dwa i di, dopi lo tan i di lo tourism lé an doulèr ? mé an minm tan néna inn la di konm sa dan lo bann touris i prétan néna osi zandarm ankétèr. Pou lèr i koné pa si zandarm i vé war volkan an promié ousinonsa i ankèt an promié é aprésa i sar war volkan, sanm pou mwin a zot va désidé. Konm i di, lèss la zistiss fé son travay. Si zot néna mwayin zwinn litil èk lagréab ? Sort laba, fé 10 000 km ryink pou fé in lankèt ?

Pou in vol la Rényon, olièrk prann lavyon, odrémié pran likoptèr pou mié war, pou mié konprann. Dann likoptèt i wa partou, dovan, déryèr, si koté, anndan partou é konm sa si volkan i pèt for banna lé la pou fé foto é pou donn la prèv, la pété pou vréman. Nout volkan, sé in bonèr pou nou. In bonèr pou bann touris, in bonèr pou lotèl, pou bann louèr loto…… Konm la piblisité i di, pou v’ni war lil intans, pou ankété pou vréman, pou war volkan pét for, dopi Pari fo pran in vol.