Kosa I ansèrv in sak ? I ansèrv bann volèr pou zot transport sak zot la vole-i di sa sé lo butin. Donk promyé prékosyon volèr, kan li sava volé, sé d’amenn avèk li in sak-avan li té I amen in goni mé komé-la goni lé rar konm korn lapin-alor in sak i pé fé l’afèr. Kisoi in sak ou i trouv dann magazin, kisoi in sak la sèrv pou anbal kékshoz dodan. Mé kosa k’i éspas kan dé volèr i marsh ansanm é ké tou lé dé I amen in sak shakinn ? Sa in komansman dézord sa ! Pars in sèl sak, ou i partaz sak na d’dan mé dé koman i fé la ? Zot va dir amoin si lé dé lé kamarad na poinn rézon inn i méfyé l’ot .. Inn i pans l’ot i sa roul ali kari sou d’ri. Dé kamarad dakor ! Mé dé volèr la pa lo mèm z’afèr. Inn i vé an avoir myé sansa plis ké l’ot é konmsa kou d’pyé, kou d’poin, i tard pa po gréné. Alé ! mi less azot réfléshi la dsi é ni artrouv pli d’van sipétadyé.