Nana déssèrtin zidé, sa i sonn konm lo vré. Wi diré lé vré, souvan défoi akoz nana domoun i fé pass sa pou la vérité. Poitan sé lo kontrèr, sé in fau kroiyans, kaziman inn kouyonad. Alor san filozofé, konm di mon kamarad Orlu, lé riskab amèn aou dann malizé san k’wi konpran kossa i ariv aou. Olèrk mète aou pli dvan, i ral aou an aryèr.

Napoin lontan, moin té apré ékoute inn-dé dalon la pa invant zèf boui, té apré di, moustik la pa résponsab si dmoun, an takon, la gingn shikungunia. Inn dan la bann, té i di mèm, kan li té i sar la pèsh l’étan, konbien gran-gran maringouin la pik ali épi li la pa tonm malad...
Zot i konpran bien dann ka lo shikungunia, lo bann moun téi pans konm sa, san fé éspré, zot la pétèt agrav lo maladi : pétète demoun lé mor dann zot famy, dann zot bann voizin, an parmi bann ti zanfan.
An plis ké sa, lé pa fasil pou konbate’ in fo kroiyans akoz nana touzour in paké dmoun i fane sa partou.

Sa i rapèl amoin in kozman gramoun lontan -pa si lontan ksa par l’fèt- i di konmsa : volkan i bril boi vèr, i bril pa boi sèk. Lé vré, la pa vré ? Sak i vé séyé, ésèy, mé mète pa zot moustash tro pré !

Justin