L’avé inn fo i pou inn bone foi in madame déor i vien ashté léguime bétrave, karote, ponm-tèr épi d’ot kondiman lé bon pou fé la salade russe dann marshé forin : èl i sèrv aèl é lo marshan i prépare toussa dann in sassé-dann tan-la téi done ankor sassé. Ala ké li domande si lo madame i vé k’i tir sansa k’i tir pa lo bande fèye. Lo madame i di èl la bézoin lo bande fane. Alor lo bononm i di kèstyonn politèss : « Vou néna d’ lapin shé vou ? ». Lo madame i réponde èl la poin mé èl i fé la soupe avèk lo bande fane. Lo boug la fé lo zyé ron épi la di avèk son marmaye : « Fé pa in konte avèk sa ! Wi oi bien banna lé pirate. »

Zordi sa sré in kékshoz banal, mé dann tan-la lété étonan ! Konm lété étonan bande kozman ou té i gingn kan wi di sinploman oute madam mète pa zognon dann konpost pars sa i tyé lo vèr d’tèr. Réponss : wi prétan ni sava manj vèr d’tère dan la kaz-la ? Koméla pti zanfan lé kapab dir aou dann zognon néna in laside é sé sa k’i fé plère lo zyé é dire ké wi antande déssèrtin apré vante lékol lontan pars téi aprann dé shoz, alé oir lékol koméla wi rante ane, wi arsorte bourik. Mwin mi diré sinploman, sé solon : kissoi wi arsorte bourik, kissoi wi arsorte savan.

Zordi mi rakonte zistoir é pou finir mi pé dir azot zistoir volkan : volkan i brile boi vèr, i brile pa boi sèk. Dann tan lontan demoune téi kri sa. ; Mèm koméla wi antande ankor dann radio koméraz demoune dir sa. Dizon wi pé kroire sa si wi vé mé kan wi boure in boi sèk dann la lave, pran oute prékossion kant mèm. Pou koué ? Pars la flame lé riskab fé in voltiz épi bril oute figuire san ké wi konpran. An touléka ou va domande domande oute bande poil dann né kan zot sar fine toute rakokiyé.. Alé ! Ni artrouv ; dê montagne i rankonte pa, mé dê moune oui.